Sujet: Mir hänn s Rysse

Z Prattele do fliege d Spöhn

wenn die Böse zämmestöhn

um mit Wyberhooge, Schlungg und so

d Oberhand im Ring z bikoo

und em Andere sy Rugge

mit vollem Schwung ins Säägmääl zdrugge.

Schad, hänn d Basler in däm Sport

numme sälte s letscht Wort.

Schwinger us de Bärgkantön

dominiere do ganz schön:

Doch s’isch s Bebbi Härz wo lacht,

wenn YB numme Zwaite macht.

S ESAF isch für jede Schwinger

all drey Joor dr grossi Bringer.

Drey Daag lang gään sii alli s Bescht

um an däm legendäre Fescht

dr Sieger-Muni haime znäh

oder e Chranz – dä miest’s scho gäh!

D Fasnacht und dä Schwingaalass

mache allne riesig Spass:

uff syni Greft kai Ruggsicht näh

heisst drey Daag lang Vollgas gäh

und denn findsch uff jede Fall

Säägmääl und Räppli überall.

Alli kämpfle ganz verbisse

und mir welles do nid misse

zwai Athlete no z erwähne,

für die mir ganz speziell dien fäne:

Es sinn die Junge do vom Voggi

die hänn Pfuus wien e Dampfloggi.

Drum stimme mir im Chöörli yy:

LARS UND JANIC: SUPER GSI!

Lang isch d Fasnacht-Pause gsi

me het scho gmaint, s goot nit vrby.

Dä Virus het is z schaffe gmacht

mängisch hämmer do nid glacht.

Doch jetz drängts is uff d Gass

Mir wänn läbe, drey Daag Spass.

In d Schue ka uns Corona bloose

uns grytzwyys an de Schwingerhoose

Suppe, Waie, e Glas Wysse

los goot’s ändlig: MIR HÄNN S RYSSE

Dangge an unsre Fotograf: danielhenziphotography.com