Buechhalteerischs (Aktualisiert 5.03.23)
– Bis hytte sinn total 27’410 kg Orange
und 4’476 kg Dääfeli
(ohni Lollies, Schläggstängel, Chuba Cubs, Mässmögge etc.) yber d’Waagekante.
– Im Gsammte isch Wurfmaterial fir 127’891.30 Frangge
verteilt worde.
– Bi de Däfilutscher hänn insgesammt 72 verschiedeni Lyt
mitgmacht, drvo 11 Fraue.
– Dr Jüngschti wo je mitgmacht hett isch 13 Joor alt
gsi, dr Senior 57 Joor
– S’treuschte Mitglied isch scho syt 41 Joor drby
|
2023
|
Noch 3 Joor Coronapause hets das Joor wieder e richtigi Fasnacht gä. S Sujet hän mir jo scho sit emene Joor gwüsst. Es isch s Eidgenösische Schwingfescht in Prattele im 2022 gsi wo zwei Söhn vo unserem Fahrer mitgmacht hän. Eine het sogar e eidgenössische Kranz gwunne! Unsri Larve isch dr Kopf vom Janic gsi, wo vor e paar Joor schonemol für uns an dr Fasnacht gfahre isch.Will so lang kai Fasnacht meh gsi isch, sin gwüsse Sache holprig gsi. So hän mir am Samschtig vor dr Fasnacht gmerkt, ass mir kai Wurfmaterial gliefert biko hänn (doch, doch, es isch schon bstellt gsi). Also hän mir grad am Samschtig no organisiert, dass mir öbbis hän zum usewärfe.
Do hän alli toll mitgholfe und mir sind den zwar mit weniger Orange, drfür aber mit „gsunde Sache“ wie Härdöpfel, Lauch und Ziebele uff e Cortège. Es isch drei Daag bewölggt und kalt gsi, drum sin wohrschiens nit eso viel Lyt am Strosserand gstande. Am Donnschtig nach em Wageabbau isch den d Sunne wieder fürecho … ☹ |
|
2022
|
Zu unsrem Beduure hett’s kai Cortège gha. Kai Mensch hetts verstande, denn d Lyyt sinn sich au sunnsch uff de Bei umegstande. Aber no drey Joor Abstinänz hämmer nit lang welle diskutiere. So sinn mir mit unsre Wägeli and Stroosefasnacht und hänn dr Mäntig gnosse. Mit weniger Lyyt, weniger Wurfmaterial, aber 100% Spass. |
|
2021
|
Kai Fasnacht wäg däre unsägliche Pandemie |
|
2020
|
In de letschte Joor isch s’Goschdym immer e heikle Punkt gsi. Mir hän e günschtigi Neiherin ka. Eifach bi dr grössi hets halt amigs nit ganz battet. So hän mir e neui Schnyderin gsucht und gfunde. Nachdäm mir uns im Herbscht schnäll einig gsi sin wägem Sujet „Digitalisierig“ hän mir e huufe tolli Idee ka. Mir hän ys den entschiede, au gwüssi Filmli z’drülle und di mit emene QR-Code am Wage azbringe. Alles isch parat gsi und dene, e paar Dag vor dr Fasnacht isch si ko. Die schreckligi Mäldig das d’Fasnacht 2020 abgsait isch. E Virus us China het sich uf Europa usbreitet und alli Verastaltige si abgsait worde. Mir hän miesse kurzfrischtig luege, was mir mit em Material mache, wo mir jetzt nit chöne bruche. Für d’Orange und Blueme hän mir e tolli Sach chöne organisiere und di de Schwizer Tafel spände. So hets ganze au no öbbis guets ka. |
|
2019
|
An dr Sujetsitzig im Herbscht hän mir uns mit Aadie fiir e Sujet entschiede, wo sich von Abschied vo u.a. zwai Bundesreet, Ladeschliessige in dr Inestadt und dr letscht MUBA befasst, entschiede. S’offizielle Sujet vom Comité het sich den au um d’MUBA drüllt und het bis zletscht ghaisse. Unseri Gedanke zu unserem Sujet sin im Detail folgendi gsi: – Aadie Wessels (wenn trittsch ändlig zrugg?) – Aadie Auti (wäg däne Linke muess ich mir jetz e Velo kaufe) – Aadie Kamm (mir Mässe uns jetz nümme mit dir) – Aadie Maistertitel (mir göhn jetz uff Bärn) – Aadie Wicky (jetz kasch mit em Sepp go wandere im Wallis – Aadie Obama (schön isches gsi ohni Fake news) – Aadie Somm (in dr BaZ hets kai Platz) – Aadie alti St. Jakobshalle (nur dr neu Name fählt no) – Aadie Negro Rhygass (nei, behaltet eure Name. Eso e Tamdam wäge nüt) – Aadie Babies im Grosse Rot (das isch au kai Kindergarte, gäll Lea) – Aadie Jüngling Thomy (und willkomme bi de Grufties) – Gopferdeckel Minu (dä Schuss isch hinte uuse) Juhui Fasnacht 2020 (am 2. März 2020 isches wieder so wit)Nach emene Wagebau im T-Shirt im Februar ischs s’Wätter den zur Fasnacht leider schlächter gworde. Räge, Sturm, jä sogar es bitzeli Schnee und aber au Sunne hän mir ka. Trotz dem durchzogene Wätter sin viil Lyt an d’Fasnacht cho. Für uns isches uff dr Route fascht es bitzeli zschnäll gange und wir hän uns miese beeile, alles Material ussezwärfe. Das Joor het übrigens s’erscht mol e Junge vo dr näggschte Generation Aktiv uff em Wage mitgmacht. Am Mäntig zobe hän mir wieder unser Partyzält in dr Stadt uffgstellt. E Partyservice het für uns grilliert und hät uns so guet verköschtigt. |
|
2018
|
Mit grossem Ufwand hän mir im Summer e neui verschalig fier e Traktor baut. Obwohl mir das Teil scho mehrmols zsämme gsetzt hän, isch nit alles so riebigslos gelaufe. Trotzdem isches glatt gsi, den mir hän bi agnähme Summer-Temperature grilliere. Drfier isch d’Fasnacht denne kalt – aber trocke – gsi. I däm Joor isch s’erscht mol die dritte Generation vo unserer Burefamilie für uns gfahre. Und au är isch sehr guet und sicher gfahre. |
|
2017
|
S’Highlight hän mir das Joor scho vor dr Fasnacht ka. S’Drummeli het 100 Waggis gsuecht, wo bi jedere Vorstellig bim ene Stiggli mitmache. Mir hän uns au gmäldet und sin den 5 mol drbi gsi. Nach emene Prolog über d’political correctness sin de di rund 100 Waggis uff d’Bühni und drno in Saal gstürmt. Usgrüschtet sin mer gsi mit Däfeli, Mimosli und au Räppli. Es isch richtig toll gsi will s’Publikum anderscht als an dr Fasnacht nit het chöne flüchte. D’Fasnacht sälber isch den Wättermässig durchzoge gsi. Am Mäntig hets dr ganzi Tag grägnet. Trotzdem hets no verhältnismässig viel Lüt in dr Stadt ka. Mir hän einiges an Material übrig ka und dr Materialykäufer het schon Angst ka, was mer mit em viele Material nach dr Fasnacht mache sotte. Aber am Mittwuch hets so viel Lüt ka, dass mir doch no s’ganze Material losworde sin. |
|
2016
|
Mir hänn scho joorelang d’Idee ka, das mir an dr Fasnacht z Oobe e Fondue uff em Waage ässe wän. Das Joor isch es denn so wyt gsi. Nach umfangriche Vorbereitige hän mir amene Waagebau e Teschtässe gmacht. S’Fondue isch dört no e weneli dünn gsi (isches ächtsch am Kirsch ooder doch eher am Koch gläge?). Am Fasnachtsmäntig hän mir noch dr Waageleerete, dr Waage bim Spiegelhoof parkiert, unser Zält uffgschlage und alles ygrichtet für es gmietligs Fondue-Stübli. Das mol isch s’Fondue perfekt gsi und dr Oobe isch den gmietlig uff dr Stroos uss klunge. |
|
2015
|
Dr Mooler resp. Kinschtler het dr Waage wie immer ganz toll und mit viel Liebi gmolt. Dr Waage und s’Sujet „Club de Waggis“ hänn glängt, ass mer sogar in dr BaZ gross abbildet gsi sin. De zwei neye Mitglieder het’s scho am Mäntig guet gfalle, obwohl s’grägnet het und wenig Lyt am Cortège gsi sinn. Am Mittwuch bi blauem Himmel und Sunne isch es den no viel besser gsi. |
|
2014
|
Die diesjährigi Fasnacht isch prägt gsi vomene Joorhundert Wetter. Drei Daag Sunne und warmi Temperature. Im Oktober 2013 hän mir unser Sujet bestumme (BVB und BLT mit em Problem am Margarethe-Stich). Im Dezämber isch den u.a. au d’BVB in d’Präss ko wäge diverse Pünkt (Vetterliwirtschaft, Sex-SMS an Mitarbeitere, türi Geschäftsauto). Durch das Publikwärde vo däne Mauscheleie hän mir wieder e Top-aktuelles Sujet ka. Unsere alte Traktor hän mir das Joor nüme biko und hän mit emene glaine miesse an d’Fasnacht. Die ganzi Verschalig hät miese apasst wärde. Dr Buur hät gsait, mir bruuche e Neue und isch uff d’Suchi. Scho am Samschtig noch dr Fasnacht hän mir uns e Traktor kauft. |
|
2013
|
Unsere letschtjährige Wagenmooler het’s Fasnachtsfieber au paggt und er het bi uns mitgmacht. Dr Mäntig isch bi uns ohni Stau duuregange. Fyr uns isches fascht zue schnäll gloffe. Mir hän den no miese e dritti Pause ylege. Bi däm Sunneschien isches aber au dört drby schön gsi. S’Juni-Bild uff em offizielle Fasnachts-Kalender isch e Foti vo unserem letschtjährige Kinderwägeli. |
|
2012
|
Noch vielne Joore mit de gliche Mitglieder, hä,n mir das Joor grad drei neui Aggdivi uff em Waage ka. Si hän di Sache aber ganz guet gmacht. Und dur dr Brueder vomene neue Mitglied isch uns e grossi Hilf bim Waagemoole ko. Dä het uns den no sehr viel druff gsprayt, unter anderem e paar Euro-Schlümpf, wo so guet gsi sin, dass si grad hätte usemene Comic-Heft chöne si. S’tolle Wätter het den no dr Räscht zunere glungene Fasnacht bitrait. Drei Wuche vorher isches no minus 15°C gsi, an dr Fasnacht hän mir den plus 15°C ka. |
|
2011
|
D’Wätterprognose sin uff Summer gstande. Bis zu 18°C sin erwartet wörde. So isch den au dr Mäntig und Zyschtig bi wunderschönem und warme Wätter über d’Bühne. Nur am Mittwuch het’s den Wolke und es bitzeli Räge gä. D’Stimmig isch eigentlig guet gsi. Mir hän aber e Monet vor dr Fasnacht e Verluscht vomene Aktivmitglied miese erläbe. Zu sim Gedänke hän mir si Larve a sim Platz ufghängt ka. Unsere Bur het uns übrigens wieder e paar schloflosi Nächt bereitet. Er hät en grössere Traktor kauft und mir hän uns den miesse überlege, mit was für eme Gfährt mir an d’Fasnacht göhn. Zum Glück hän mir dr alti Traktor nonemol chöne uslehne. |
|
2011
|
D’Wätterprognose sin uff Summer gstande. Bis zu 18°C sin erwartet wörde. So isch den au dr Mäntig und Zyschtig bi wunderschönem und warme Wätter über d’Bühne. Nur am Mittwuch het’s den Wolke und es bitzeli Räge gä. D’Stimmig isch eigentlig guet gsi. Mir hän aber e Monet vor dr Fasnacht e Verluscht vomene Aktivmitglied miese erläbe. Zu sim Gedänke hän mir si Larve a sim Platz ufghängt ka. Unsere Bur het uns übrigens wieder e paar schloflosi Nächt bereitet. Er hät en grössere Traktor kauft und mir hän uns den miesse überlege, mit was für eme Gfährt mir an d’Fasnacht göhn. Zum Glück hän mir dr alti Traktor nonemol chöne uslehne. |
|
2010
|
Mir hän d’Ueberwachig in Basel usgspielt und sin als „Pozilei“ uff en Cortège gange. Alli Polizischte wo’n is gseh hän, hän miese zweimol luege ob mir jetz Kollge oder Fasnächtler sin. Wo si uff unserem Kostüm aber Pozilei gläse hän, isch alles klar gsi und es het sich eso mängs glatts Gspröch ergä. |
|
2009
|
Unseri einzigi Frau isch kranketshalber kurzfrischtig usgfalle sodass mer si durch e anderi (Ehe-)Frau ersetze hän miese. Es isch alles guet gange und das Päärli isch immer no zämme. Uff em Cortège isch uns no ufgfalle, dass es vieli Holländer unter de Zuschauer ka het. Däne het i däm Fall d’EM 2008 in Basel trotz dr Niederlag gege d’Russe im Viertelfinal gfalle. |
|
2008
|
Das Joor sin mir es bitzeli zweigleisig gfahre. Näbe unserem Sujet von dr Fussball-Euro vom Summer in dr Schwiz hän mir uff unserem Schwiizer-Waage no es paar schwarzi und wissi Schöfli gmolt in aspielig an d’National- und Ständerots-Wahle vom letschte Herbscht. |
|
2007
|
Zu unserem Jubiläum hän mir e neue, grössere Wage für d’Fasnacht baut. Zem 25-jährige Bestoh vo dr Clique sin mir mit emene silbrige Frack uff d’Route. E Grindigsmitglied wo syt 25 Joor drby isch, het als Usszeichnig e goldige Frack ka.Zobe isch den d’Gugge Akademiker zu uns uf e Märktplatz ko und hett no es paar Stickli zu unserem Jubiläum gspielt. |
|
2006
|
D’Zuschauer hän emol kei Abstand vom Wage wäge unsere Räppli ka, sondern wäge de Schneehüüfe am Bode. Am Samschtig vor dr Fasnacht hett’s e Rekordschneefall vo über 50 cm in Basel gäh. Entsprechend wiss isch den d’Fasnacht gsi. |
|
2005
|
Do d’Fasnacht dissmool uff e Valentinstag gfalle isch sin mir entsprächend mit Blueme ussgrüschtet uff d’Pischte. S’Wätter hetts grad no guet gmeint und nit allzue fescht und hüffig gschneit. Am Zischtig hän mer s’erscht Mool s’neui Kinderwägeli usprobiert, 8 Kinder sin derbi gsi und s’het alle e grosse Spass gmacht. S’Sujet „nit ganz dicht“ het au zum Wätter passt und isch ganz trendi gsi, gange isch’s derbi um die neu Passerelle am Bahnhof wo bi Räge iine loot. |
|
2004
|
dismool mit Schampo, sin uns sogar Lüt wäge de Hoorspray go sueche, wo si vo uns im letschte Joor beko hän. Uff ihre Vorschlag, uns in „Hoorspray-Waggis“ umztaufe sin mir aber nit iigstiege. Uff e saukalte Mäntig isch e aagnähm warme Mittwuch gfolgt. |
|
2003
|
hän mir denn sogar no um zwei Plätz miesse uffstogge und göön jetzt mit 10 Lüüt hinde uff em Waage an d’Fasnacht. D’BZ het e Fotti brocht, d’BAZ e Zeedeluuszug und mir sin mit em EXPO-Sujet „Art de Blamage“ voll im Trend glääge. Dr Traggtor het e neui Verkleidig griegt und der Waage e Gstell fürs Material. Dr erfolgriichschti Artiggel wo mer verteilt hän, sin d‘Hoorspray gsi. |
|
2002
|
zum 20-jöörige Jubileum hän mir mittlerwiile drei Aggtive zum Relaunsch aagsetzt neui Lüüt aquiriert und sin topaggtuell zum Swissair-Debaggel mit em Sujet „Syyt 20 Joor kai Grounding“ und mit fascht Vollbestand an Cortège. |
|
2001
|
hän mir, d.h. die mittlerwiile zwei übrig blibene Aggtive, zämme mit de Bebbi Waggis Fasnacht gmacht. Das Ganzi het aber nur e Joor ghebt. |
|
2000
|
D’Expedition Robinson uff em TV3 het au uns begeischtered, so hän mir das Sujet bi schönem Wätter guet chönne uspiele. Dr Beat wo grad im WK gsi isch, het’s z’wörtlig gno und isch am Mittwuch denn nümme ko (är hett kai Urlaub beko). Syt denn hän mir ihn nümme gseh (er isch wohrschiins „ab uff d’Insle“ …) |
|
1999
|
hän mir aagfange dr Noochwuchs im e Balkon vorne uff em Traggtor lo Fasnacht mache. Am Zeedel und an dr Dekoration isch lang erfolglos umestudiert worde. Mir hän’s Sportjoor 98 in Franggrich welle usspiele (u.a. Fussball-WM). Do uns nüt Gscheits in Sinn ko isch, hän mir s’Sujet im letschte Momänt gändert und 2 Stund spöter het d’Christa scho e tolle Zeedel gschriebe ka. |
|
1998
|
s’Schoof Dolly het au uns beiidruggt und so hän mir „au mir klone und disaine“ usgspielt und sin sogar in dr Personalzytig vo dr Novartis ko. (Beachtig hän au di „schöne“ runde Eier uff em Waage vo unserem „Ober-Handwerker“ gfunde…) |
|
1997
|
sin uns imene Restaurant Tischsets uffgfalle mit ere Fotti vo uns us em ’96! |
|
1996
|
het unser Sujet vo de Atom-Versüech vo de Franzose ghandelt. Mir hän unsere Waage ganz „AJZ“-mässig deggoriert und hän gfordered „Lieber Hanf statt Nylon“. Die ganz Fasnacht het d’Sunne gschuune und mir sin froh über’s neui Dach gsi wo uns Schatte gä het. |
|
1995
|
Het’s am Mittwuch Zoobe unser Not-Dach drvo gwindet und so pflotschnass wie mer gsi sin hän mir beschlosse, e richtigs Dach für s’näggschte Joor zmache um eso zuekünftig im Troggene könne Fasnacht zmache. |
|
1994
|
hän mir s’Sujet Taxi Dancers usgspielt. Zoobe uff em Marktplatz hän mir sogar e Rock ’n Roll-Tanz uff s’Räppli-Parkett gleggt. Dä isch so guet gsi, dass mer grad zwei neui wyyblichi Mitglieder für e Vortrab im Joor druf gwunne hän. |
|
1993
|
Mit unserem bishär beschte Zeedel sin mir zobe no go Schnitzelbänk singe („Condomeria isch grad am Rhy a …“). Mir hän immer e paar Lyt uffgforderet, e „intime Kreis“ z’bilde und mit uns dr Zeedel z’singe. |
|
1992
|
hän mir „s’Postillon d’amour“ usgspielt. Wo mir nach dr Fasnacht ins Le Plaza gange sin und unsere Zeedel unters wyybliche Volk brocht hän, het dr Chef de Service das mitbeko und uns spontan zumene Drink für dä glungeni Zeedel iiglade git’s e Poschtkarte vo unserem Koschtüm. Nach dr Fasnacht het en Aggtive von ere Bekannte us Bärn e Poschtkarte mit Fasnächtler druf beko. Si het nur gwüsst, dass är Fasnacht macht. Är isches sogar sälber gsi wo uff dr Karte abbilded gsi isch! |
|
1991
|
unsere Waage vo richtige „Sprayer“ gschtallte lo. |
|
1990
|
sin mir s’erschte mool mit em Markus und sim Sohn Thomas us Schönebuch an dr Fasnacht gfahre, und das mache mer au hüt no so. |
|
1989
|
sin mir mit em Sujet die „Fusionierte“ an d‘Fasnacht. Aaschliessend hett’s dr erschti grossi Krach gä und d’Helfti vo de Aggtive isch usträtte. |
|
1988
|
hän mir mit unserem Sujet „Cortège 2000“ die immer grösser wärdendi Zahl vo aggtive Fasnächtler und s’Stauproblem usgspielt. Im Färnseh hän si das aber uff d’Bahn 2000 bezoge. |
|
1987
|
hän mir s’Sujet „die vergoldete Spieler“ (FCB) usgspielt. Rund 4 Monet spöter isch dr FCB den abgstiege (nit wäge unserem Sujet!). |
|
1986
|
hän mir s’Sujet „dä Duft in dr Luft“ usgspiilt. Rund 9 Monet spöter het’s den dr Unfall in dr Schwitzerhalle gä.Es isch vom Wätter här e triebi Fasnacht gsi drfür het unseri helli Perrücke so richtig usegstrahlt. |
|
1985
|
sin mir denn s’erscht mool mit eme Traggtor unterwägs gsi. Will s’Comité gfunde het mir siige no z‘jung (Durchschnittsalter 17 Joor), hän die das nit erlaubt und so hän mir uns dr Guggemusig Bebbilisgge aagschlosse und sin trotzdäm am Cortège gfahre. |
|
1984
|
hän mir s’erscht mol einheitlichi Larve und Goschdym ka. |
|
1983
|
hän mir mit eme Poschtwäägeli aagfange wo mir au sälber zoge hän. Alli 300 Meter het’s bim zieh e Wächsel gä. S’Durchschnittsalter isch 15 Joor jung gsi. |
Däfilutscher 