Triffsch e Koleeg hit uff dr Gass
sottsch konzentriert sy – s isch kai Spass
muesch dini Wort preezis weele
sunscht kenntisch ihn mental no gweele.
Isch d Aareed au politisch richtig?
Welli Wäärt syn im denn wichtig?
Isch «äär» e «äär» oder e «sie»?
oder bi «diväärs» drby?
Do muesch grausam zügig syy
sunscht isch dr Koleeg au scho vrby.

Dä Gender-Stäärn macht is konfus
oder kemmet ihr no druss?
Isch me mit GenDER voll drby
sottis denn villicht au GenDIE syy?
Me will do jo kai Foopa mache,
au wenn’s tönt, als siggsch nit klar.
Kasch dr Mie gää, wie de wotsch
du formuliersch nie wie de sotsch
vergissisch eppis, was passiert?
Grad isch eine/eini/eins pikiert!

«Indianer» sage isch verpöönt
au an «Schwoob» hän mir is gwöönt
doch au das isch nimmi konform,
nit korrägt, uss dr Norm.
Mit all däm kennte mir no lääbe
doch es git Begriff drnäbe
uff die mir nit verzichte wänn
wo uns e Sinn im Lääbe gänn.
Das «W»-Wort isch fir uns zentral
exischtenziell, gar nit banal
Bi aller Liebi, doch mir kenne
uns nit «Elsass-Persone» nenne.

Mir fyyle uns scho jetz biz komisch
wel’s jo offesichtlig so isch,
ass das «W-Wort» au e glii
politisch aageignet kennt si.
Du darfsch au wyter Waggis schreye,
kai Angscht, ass mir denn duurekheie
mient aifach seh, ass mir vom Waage
au Miggeli und Digge saage.

Jede soll syy Lääbe lääbe,
dient nit an Konvenzione klääbe
und wisset ihr’s nit ganz genau
hilft hunderprozäntig XMV.